Adat Basandi Syarak

Adat Basandi Syarak, Baa Mamahaminyo?

Satantang sandi.

Kalau kaji dalam adat Minang, sajauah ambo baco: sandi buliah datang kudian. Marujuak kapado pambuatan rumah adat Minang (nan asli). Batu sandi dipasang sasudah tunggak jo kudo-kudo tatagak.Minangkabau lah ado sajak zaman pra-sejarah.

Jadi, walaupun Islam talambek ka Minangkabau, karano suai, dijadikan sandi adat. Nan sabalum tu, adat basandi alue jo patuik.

Maso Syekh Burhanuddin: Adat basandi syarak, syarak basandi adat.

Sasudah itu Piagam/Sumpah sati Bukik Marapalam: akomodasi adat terhadap Islam.

Minang tidak pernah tercatat “ditaklukkan” Islam.

ABS-SBK hasil pertemuan Bukik Marapalam. Diputuihkan dek masyarakat adat, bukan dek panglima perang/pemuka/ulama Islam.

Adat Minangkabau iyo bersendikan syarak, karano masyarakat adat manarimo, maanggapnyo sasuai. 

Tantang nan ma nan sasuai, jaleh kaduo balah nyo. Sasuai bukan MANYASUAIKAN. Sasuai tu bahaso adatnyo “batamu rueh jo buku”. Sandi bisa/buliah diasak/diganti. Mako sandi diasak, kalau ndak suai.

Contohnyo: Hak waris. 

Karano harato pusako tinggi bukan pancarian laki2 dan nasabnyo ka ateh, mako sandi kewarisan Islam ndak dipakai, karano harato pusako tinggi hasil pancarian/ perjuangan saudaro2 dari perempuan sarato ibu2 dan nenek2 mareka.

Sandi rumah adat Minang punyo kelebihan dari pondasi. Kalau sandi indak malakek kaku/rigid ka bumi; indak pulo malakek ka tunggak. Luwes ka ateh ka bawah.Hal iko sasuai jo alam Minangkabau nan sapanjang zaman dihoyak gampo. Katiko gampo datang, sandi barayun, rumah manari.Kalau pondasi, kaku malakek ka bumi, lakek ka tunggak.Kalau tibo gampo, baradu kuaik. Kalau pondasi kuaik, tunggak kuaik,dindiang kuaik: aman.Ciek sajo ndak kuaik, apolai gampo di ateh 7 SR, pasti rarak.

Ma nan labiah tinggi adat jo ajaran Islam.

Manuruik ambo: indak ado nan tinggi jo randah, kuat jo lamah, karano kaduo nyo dari Allah.

Kalau Islam c.q. Al-Qur’an diturunkan sabagai wahyu malalui Rasulullah. Nan adat sabagai buah budi jo daya manusia Minangkabau, “diturunkan” Allah sabagai ‘irhas’, ‘ilham’ nan lah bakulindan salamo ribuan tahun.

Kalau kito pakai adagium “ayat”, mako ajaran Islam adolah ayat qur’aniyah (nan tatulih), mako adat Alam Takambang Jadi Guru adolah ayat “qauniyah”.Manuruik ambo, ayat-ayat qur’aniyah diturunkan Allah kapado nabi-nabi dan rasul-rasul-Nyo.

Ayat-ayat qauniyah diturunkan Allah kapado saluruah umat manusia ciptaan-Nyo. 

Karano ayat-ayat qauniyah diturunkan sarantak jo alam, mako irhas dan ilham diturunkan pulo ka saluruah manusia pilihan-Nyo, pamimpin2/urang2 cadiak pandai, nan bukan nabi atau rasul.

Adat nan “diturunkan” Allah ka urang Minang labiah daulu dipakai. Mako ado sabagian hasil budi daya tu babeda jo budi daya nan tumbuah sakitar wilayah tampek turun ayat nan tatulih, di Makah/Madinah. Karano situasi, kaadaan, maso nan babeda.

Budi daya nan lah tagak, paralu diagiah landasan, di siko sandi paralu.

Jadi, nan dicarikan/diagiah sandi tu, adolah tunggak jo kudo2 nan lah tagak (adat istiadat nan lah dipakai).Ma nyo contoh budi daya nan babeda: bahaso, caro bapikia, hubungan/interaksi antar manusia, kekerabatan, sandang, pangan, papan, dan sagalo urusan satantang itu.

Tantang ilham jo irhas,

Banyak referensi nan bisa dibukak. Sakadarnyo sajo: nan irhas dan ilham barkaitan jo hal kautamaan/nan baiak2, datangnyo dari Allah ka hati ketek manusia. Mako mustahil ilham jo irhas batantangan jo wahyu. Kalau batantangan, itu bukan ilham/irhas, hanyo buah pikiran.

Ilham jo irhas ko eksis dalam bantuak pituah/patunjuak/rambu2 dari pemimpin/tokoh/niniak muyang.

Samaso adat basandi alua jo patuik, lah ado pituah nan bapakai, sarupo: malu jo sopan. Katiko bahaso Minang sabagai hasil budi daya bakambang, mako bahaso diagiah sandi malu jo sopan, tagaklah budaya Kato Nan Ampek di ateh sandi Alua jo Patuik, Malu jo Sopan.

Katiko datang Islam jo ayat tatulih Qur’an, batamu lah sandi nan sasuai: qaulan karima, qaulan ma’rufa.

Tantang ABS-SBK nan dipakai di Riau, Jambi dan lainnya.

1. Ambo juo mandapek-i banyak budaya Muslim bangso-puak-masyarakat lain nan mamakai hal nan samo. Mungkin dunsanak labiah tahu, misalnyo di Riau, Jambi, bahkan di Gorontalo. Ambo yakin masih banyak nan lain.

Karano itu ambo bapandapek: proses peletakan sandi nan tajadi di berbagai masyarakat itu samo. Bahkan ambo bapandapek: sabagian besar falsafah/pituah/ sandi2 adat nan bakambang di Nusantara ko banyak nan samo. 

2. ABS-SBK adolah tafsir ilham jo irhas nan ditarimo niniak moyang. ABS-SBK bukan irhas jo ilham itu 100%, bukan pulo 100% kreasi/ciptaan niniak muyang. Peran tokoh/pamimpin masyarakat hadir pado penafsiran tu. 

3. Manuruik ambo, irhas jo ilham nan diturunkan Allah sajak samulo, indak turun eksklusif kapado satu duo pamimpin/tokoh masyarakat. Irhas dan ilham tu turun sajalan jo alam, sampai nyo ka banyak pamimpin/tokoh di banyak kelompok/masyarakat. Allah manurunkan ilham dan ilham sabagai “manual”/”buku” pedoman pemakaian satiok ciptaan-Nyo, untuk berinteraksi jo satiok ciptaan-Nyo.

Manuruik ambo: Fungsi ilham jo irhas samo jo wahyu: “untuk padoman baa hiduik nan elok”. Karano maso tulih-baco alun mamungkinkan, Allah manurunkan irhas jo ilham ka banyak tokoh di banyak masyarakaik.

Katiko maso wahyu, turun eksklusif ka nabi jo rasul, untuak ditulih-dibaco.

4. Untuak alam nan hampia samo kaadaannyo, ilham jo irhas nan ditarimo pamimpin tantu samo. Mako lahia lah pituah/falsafah/ pedoman nan samo bunyi-nyo. Kaadaan iko lah nan manyababkan ABS-SBK nan mirip muncul di berbagai masyarakat Nusantara.Samo, karano Allah turunkan sacaro simultan ka tokoh/pamimpin di alam/masyarakat nyo punyo kasama-an.

5. Pado tataran irhas jo ilham itu samo. Tapi pado tataran penafsiran/ penerjemahan dan implementasi: budaya, tantu tajadi variasi. Samo hal nyo Al-Qur’an jo tafsir nan baragam. 

6. Tantangan ABS-SBK di Minangkabau, manuruik ambo asli tafsiran niniak muyang urang Minangkabau tarhadap irhas jo ilham nan mareka tarimo. Baitu juo ABS-SBK di Riau, Jambi, Gorontalo, asli tafsiran niniak muyang masiang-masiang tarhadap irhas jo ilham nan mareka tarimo.

7. Satantang parubahan, tantu iyo. Interaksi antar masyarakaik, diaspora, tantu manyababkan tafsir tu saliang mampangaruahi.

8. Satantang Adat jo Syarak batikai, manuruik ambo duo-duonyo harus barundiang duduak sameja. Sabalumnyo ambo tambahkan: Syarakpun adolah tafsir terhadap wahyu, sabagaimano adat tafsir tarhadap irhas jo ilham. Kalau ilham jo irhas batikai jo wahyu, mako itu bukan ilham jo irhas. Veto nyo langsung, indak ado rundiangan. 

9. Kalau bertikai Syarak dan Adat, tegakkan Syarak, itu ABS-SBK di Riau. Di Minang tidak dinyatakan begitu.

10. Tentang syarak mandaki, adat menurun: ini menyangkut perjalanan/penyebarannya di tanah/wilayah Minang. Syarak mendaki dari Siak/Riau dan/atau dari Pariaman/Ulakan. Adat menurun dari Darek ke pesisir.

11. Syarak mangato adat mamakai: pedoman pada upacara terkait agama, seperti pernikahan. Apa upacara yang diperintah agama dilaksanakan, tapi walimah/perhelatan/pakainnya diatur adat. 

12. Mengenai Syarak batilanjang, Adat basisampiang: itu bahasa kias. Batilanjang disini terus-terang, buka-bukaan, seperti mengaji fiqh-munaqahat. Basisampiang, menggunakan bahasa kiasan/lambang/ konotasi/ ibarat, tidak luruih tabuang. Coba sanak baca semua peribahasa/pituah adat, semua pakai ibarat.

Apokoh Posisi Syarak labiah tinggi dari adat?

1. Ambo satuju kalau syarak disiko dimaknai sabagai wahyu. Dalam hal iko suai jo pandapek ambo tarakhir: kalau irhas/ilham batikai jo wahyu, mako itu bukan irhas/ilham. Kabiasaan nan tumbuah dari ilham samacam itu langsuang bukan adat.

Contoh: kabiasaan mananam kapalo kabau untuk mamuloi mambangun.

Mungkin dulu iko muncul dari “ilham” tertentu untuk persembahan. Ilham tentang persembahan sarupo itu bertentangan jo wahyu. Haram manuruik syarak.

Mako jatuah posisi ilham “persembahan” dalam bantuak apopun. Itu bukan adat.

2. Kalau syarak dalam pemahaman nan lain: aturan fiqh hasil penafsiran mufassir dan fuqaha terhadap wahyu.

Katiko aturan tu batikai jo adat, mako kito baliak ka wahyu sebagai sumber syarak, dan mangkaji sumber munculnyo adat.

Contoh: Nan paliang “hot” hak waris untuak cucu padusi dari anak padusi. Debat panjang ko diangkek dek Prof. Amir Syarifuddin. Ulama fiqh kito. Manuruik baliau, kalau surang laki-laki diurus di rumah anak padusi nyo, diagiah makan-minum dirawat cucu padusi nyo, sarupo biaso di Minangkabau. Mako hak waris cucu laki-laki harus hapus, diganti jadi hak waris cucu padusi dari anak padusi.Baliau antaro lain managakkan tu malalui ayat “adil”, bukan ayat “waris”. Disiko syarak dikaji ulang.

Apokoh syarak samo jo wahyu?

Mungkin manjadi sabab parbedaan pandapek manganai posisi adat jo syarak.Katiko syarak dipandang samo wahyu, mako pandapek ulama manjadi mutlak. Katiko ulama mangatokan sasuatu “haram” mako itu manjadi haram.

Patikaian Kaum Tua vs Kaum Muda banyak tajadi dalam hal iko.Contoh nan populer katiko Inyiak Jambek (Kaum Muda) mamakai sarawa pantalon. Tajadi polemik.

Manuruik kaum tua: Pantalon tu pakaian Ulando, pakaian urang kapia. Maniru urang kapia, haram.

Inyiak Jambek: “Jubah tu samo jo pakaian Abu Jahal, nan pakai jubah maniru Abu Jahal.” 

Di siko parintah wahyu batua: haram maniru urang kapia.

Tapi syarak (aturan hasil tafsiran ulama) perlu dikaji ulang. Apa memakai jubah, memakai pantalon itu yang dimaksud ayat.

Tantang syarak nan ditatapkan ulama ado 4 dasarnyo:

1. Al-Qur’an

2. Sunnah

3. Ijma’

4. Qiyas.

Al-Qur’an ditarimo di Minangkabau sabagai wahyu nan mutlak.

Sunnah atau Hadist baragam tingkatannya.

Katiko syarak nan ditatapkan manggunokan hadis shahih mutawatir, umumnyo indak tajadi parbedaan.Katiko tingkatan hadis hasan atau ahad, banyak tajadi khilafiyah.Tantang “Bismillah” dikarehkan/jahar, atau indak dibaco,… sampai abaik 21 ko masih babeda-beda pandapek ulama. Ka pakai qunut atau indak. Tarawih 8 atau 20 rakaat. dll.

Katiko Ijma’ jo Qiyas dipakai, tajadi mazhab-mazhab. Kato mazhab Syafii, koncek/katak haram. Kato mazhab Hanafi halal. Syarak sabana baragam kalau lah sampai di tingkek ko.

Contoh “hot” tarakhir:”Alkohol haram. Mako tapai haram, alkoholnyo 30%.”Pernyataan haram (Syarak) nan iko adolah hasil pamikiran ulama kito juo. 

Manuruik ambo, syarak paralu dilatakkan sabagai hal nan tatap mambukak pintu perbedaan pandapek. Ijtihad paralu taruih dilakukan para ulama, supayo syarak tatap aktual.Karano banyak nan harus dibari sandi syarak di zaman modern ko.Baa tantang bank, bursa efek, asuransi, jua bali di dunia maya, dll. Budaya nan taruih tumbuah. Syarak harus mambari jaweknyo.

Wallahu’alam.

oleh Tuangku Mangkudun

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s